Evróputilskipun um gagnsæi í launum | Sækja rafbók hér.
Landspítali notar hugbúnað PayAnalytics til að vinna gegn launamun kynjanna
Landspítali hefur skrifað undir samning við PayAnalytics um notkun á hugbúnaði þess við jafnlaunagreiningar spítalans. Hugbúnaðarlausn PayAnalytics er notuð af fjölmörgum fyrirtækjum, sveitarfélögum og stofnunum til að styðja við faglegar launaákvarðanir.
Hugbúnaðurinn greinir launamun kynjanna, leggur til leiðir til úrbóta, og reiknar út kostnaðinn við leiðirnar þannig að hægt sé að skipuleggja aðgerðir til að eyða launabilinu. Einnig leggur hugbúnaðurinn til laun fyrir nýja starfsmenn og starfsmenn sem flytjast til í starfi, til að tryggja áður en ákvarðanir eru teknar að þær séu sanngjarnar og að ómeðvituð hlutdrægni ýti ekki launamuninum upp. Landspítali stefnir að jafnlaunavottun fyrir árslok og mun fylgjast náið með launamun kynjanna í framhaldinu. Samstarfið við PayAnalytics auðveldar þá vinnu.
Samningurinn við Landspítala er þýðingarmikill fyrir PayAnalytics, bæði vegna þess að stærsti vinnustaður landsins sér sér hag í að taka lausnina okkar í notkun en ekki síst vegna metnaðarins sem við sjáum þau leggja í að útrýma kynbundnum launamun. PayAnalytics var stofnað til að bregðast við þörf fyrirtækja sem vildu draga úr launamun en vantaði tól til að gera það með sanngjörnum og hagkvæmum hætti. Það hefur sýnt sig að góður ásetningur dugar ekki einn og sér, heldur þarf að beita markvissum gagnadrifnum aðferðum til útrýma launamuninum.
segir Sigurjón Pálsson, framkvæmdastjóri PayAnalytics.
Samstarfið við PayAnalytics mun auðvelda okkur ferlið að jafnlaunavottuninni. Við getum núna með auðveldum hætti haldið utan um launagreiningar og launaákvarðanir verða markvissari þar sem þær verða alltaf teknar út frá nýjustu upplýsingum.
segir Lúvísa Sigurðardóttir, verkefnastjóri jafnlaunakerfis spítalans.
